«Հայաստանի եվրոպական համալսարան» հիմնադրամը հիմնադրվել է 2001 թվականին Հայաստանի Հանրապետության կառավարության և միջազգային մի շարք հեղինակավոր կազմակերպությունների միջև կնքված համաձայնագրերի հիման վրա: Որպես միջազգային բուհ՝ Հայաստանի եվրոպական համալսարանը (ՀԵՀ) միջազգային առաջատար փորձի և տեղական կրթակարգի լավագույն ավանդույթների մեկտեղմամբ` որդեգրեց ուսուցման արդի կառուցակարգ: Արդեն այսօր ՀԵՀ-ում առկա է ուսուցման եռաստիճան համակարգ` առկա և հեռակա կրթական ծրագրերով` նախատեսված ինչպես հայազգի այնպես էլ օտարերկրյա դիմորդների համար:
         Հայաստանի եվրոպական համալսարանը իրականացնում է.

• 16 բակալավրի կրթական ծրագիր,
• 15 մագիստրոսի կրթական ծրագիր,
• 4 հետբուհական կրթական ծրագիր:

Համալսարանի գիտակրթական մասշտաբները չսահմանափակվեցին միայն քաղաք Երևանով, դրանք ընդգրկեցին նաև Հայաստանի մարզերը։ Արդյունքում, համալսարանը հիմնեց մասնաճյուղեր Գյումրի, Վանաձոր, Իջևան և Կապան քաղաքներում՝ այդպիսով ընդարձակելով մրցունակ կրթության արտահանման ծավալները։

         Առաջնորդվելով Հայաստանում կրթությունը գրավիչ և մրցունակ դարձնելու ընդգծված առաջնահերթությամբ՝ Համալսարանի համար գերակա դարձավ նաև արտաքին կապերի խորացումը և գործընկերային ցանցի ընդլյանումը։ Բուհի միջազգայնացմանը, եվրոպական կրթական տարածքում նրա հեղինակության ամրապնդմանը մեծապես նպաստեց անդամագրումը բարձրագույն կրթական հաստատությունների եվրոպական ասոցիացիային` ԵՎՌԱՇԻՆ (EURASHE), որի անդամ Համալսարանը դարձավ 2018 թվականին։
Համալսարանի միջազգայնացման և գործընկերային կապերի խորացման առհավատչյան, բուհի ստեղծման օրվանից մի շարք արտասահմանյան բուհերի հետ ծավալվող հարաբերություններն էին և ձեռք բերված պայմանավորվածությունները՝ որոնց թվում կարելի է հիշատակել Իտալիայի Հանրապետության Բոլցանոյի «ԵՎՐԱԿ» («EURAC») գիտահետազոտական կենտրոնը, Լիոնի առևտրարդյունաբերական պալատի «ԷԿԼԻԱ» («EKLYA») բիզնես դպրոցը և «ՀԻԲՐԻԱ» («HYBRIA») բիզնեսի և տեխնոլոգիաների ինստիտուտը, Իտալիայի Հանրապետության «ՊՈԼԻԱՐՏԵ» արվեստի և դիզայնի ակադեմիան, Անգլիայի Չելսի բիզնես դպրոցը և այլ կրթական հաստատություններ: Հատկանշական է, որ նրանց մի մասը հանդիսանում են Համալսարանի հիմնադիրներ և Հոգաբարձուների խորհրդի անդամներ։
Ներպետական մակարդակում Համալսարանը ևս արձանագրում է նշանակալի ձեռքբերումներ, կնքելով երկկողմ պայմանագրեր, որոնք առնչվում են ուսումնական ենթակառուցվածքների զարգացմանը, պրոֆեսորադասախոսական կազմի վերապատրաստմանը, օտար լեզուների ուսուցմանը, ուսումնագիտական և մեթոդական ձեռնարկների հրատարակմանը, սեմինարների և գիտաժողովների անցկացմանը և բազմաթիվ այլ ձեռնարկումներին։ Ահա դրանցից մեկը՝ Վիվասել-ՄՏՍ և Սինոփսիս Արմենիա առաջատար ընկերությունների միջև կնքված եռակողմ համաձայնությունը, որի շնորհիվ 2011 թվականին Համալսարանում բացվեց ժամանակակից կահավորմամբ, սարքային և ծրագրային ապահովման միջոցներով հագեցած Միկրոէլեկտրոնային սխեմաների և համակարգեր ամբիոնը:
2023-2024թթ. ուսումնական տարվանից սկսած բուհը իր բոլոր մասնագիտությունների գծով իրականացնում է լրացուցիչ միջազգային կրթական ծրագրեր, որի արդյունքում՝ մեր կողմից շնորհվում է ակադեմիական կրթության պետական հավատարմագրված նմուշի դիպլոմ, իսկ մեր գործընկերների կողմից մասնագիտական կրթության դիպլոմ, որը առավելապես հենվում է անձի հմտությունների և գործնական կարողությունների զարգացման և աշխատաշուկայի պահանջների վրա:
         ՀՀ ԿԳՄՍ հավատարմագրման հանձնաժողովի 2021 թվականի հուլիսի 24-ի N 55 որոշմամբ բուհին շնորհվել է ինստիտուցիոնալ հավատարմագրում՝ 4 տարի ժամեկտով (վկայական N 51):

Հիմնական ԱՌԱՎԵԼՈՒԹՅՈՒՆՆԵՐՆ են՝

•     Միջազգային բուհ
•     Պետական հավատարմագրում
•     Պետական նմուշի դիպլոմ
•     Կրթական ծրագրեր եվրոպական չափորոշիչներով
•     Երկու դիպլոմ և մասնագիտացման կրթական ծրագրեր եվրոպական առաջատար կրթական կազմակերպությունների հետ
•     Շարժունության ծրագրեր եվրոպական լավագույն բուհերի հետ
•     Բարձրագույն կրթական հաստատությունների եվրոպական ասոցիացիայի (EURASHE) անդամ (միակը Հայաստանում)
•     Միջազգային կրթական և հետազոտական ալյանսի (IERA - International Education and Research Alliance) լիիրավ անդամ
•     Արտաքին գործընկերներ աշխարհի տարբեր երկրներում
•     Որակյալ կրթություն եվրոպական չափորոշիչներին և ուղենիշերին համապատասխան
•     Փոխանակման ծրագրեր միջազգային հեղինակավոր բուհերի հետ
•     Անգլերենի խորացված ուսուցում
•     Մասնագիտական դասընթացների դասավանդում անգլերենով
•     Դասավանդման և ուսումնառության նորարական մեթոդներ:

Գործում է ՆԱԽԱՊԱՏՐԱՍՏԱԿԱՆ ԲԱԺԻՆ բոլոր մասնագիտությունների համար, որի ՈՒՍՄԱՆ ՏԵՎՈՂՈՒԹՅՈՒՆՆ է 1 ուսումնական տարի: ՀԵՀ-ն 2021 թվականին անցնելով ռեբրենդինգ՝ հանդես է գալիս նոր կարգախոսով՝ ԲԱՑԱՀԱՅՏԻ՛Ր ԵՎՐՈՊԱԿԱՆ ԿՐԹԱԿԱՆ ԱՐԺԵՔՆԵՐԸ ԵՎ ԿԱՌՈՒՑԻ՛Ր ԱՊԱԳԱԴ ԱՅՍՕՐ: Այն ունի արտաքին գործընկեր աշխարհի տարբեր երկրներում:

Ներկայումս ՀԵՀ-ում գործում են հետևյալ մասնագիտությունները․

•     Տեղեկատվական տեխնոլոգիաներ
•     Տեղեկատվական համակարգեր
•     Տեղեկատվական անվտանգություն
•     Ինֆորմատիկա (Ռոբոտաշինություն և խելացի համակարգեր)
•     Կառավարում (Մենեջմենթ)
•     Տնտեսագիտություն և բիզնեսի զարգացում
•     Շուկայագիտություն (Մարքեթինգ)
•     Ֆինանսներ և բանկային գործ
•     Իրավագիտություն
•     Միջազգային հարաբերություններ և դիվանագիտություն
•     Գրաֆիկական դիզայն
•     Ճարտարապետություն և լանդշաֆտային դիզայն
•     Հոգեբանություն
•     Զբոսաշրջություն և հյուրանոցային գործ
•     Լեզվաբանություն (Մասնագիտական թարգմանչություն)
•     Մասնագիտական մանկավարժություն (Անգլերեն լեզու և գրականություն):
•     Կրթության կառավարում: